Basoko lanetan Pilatzeko eta Kargatzeko zereginen segurtasun-jarraibideak

Baso-lanetako segurtasun-jarraibideen inguruan oro har eta Mozteko eta Ateratzeko zereginen segurtasun-neurrien gainean espezifikoki hitz egin ondoren, zikloa itxiko dugu, eta, orain, ondorengo bi lanen segurtasunari erreparatuko diogu: Pilatzea eta Kargatzea. Lan horiek lasaiagoak eta arrisku txikiagokoak direla pentsa dezakegu, baina prozesuaren amaieran adi egoteari uzten badiogu, arrisku handiak sor daitezke.

Baso-lanetako segurtasun-jarraibideen inguruan oro har eta Mozteko eta Ateratzeko zereginen segurtasun-neurrien gainean espezifikoki hitz egin ondoren, zikloa itxiko dugu, eta, orain, ondorengo bi lanen segurtasunari erreparatuko diogu: Pilatzea eta Kargatzea. Lan horiek lasaiagoak eta arrisku txikiagokoak direla pentsa dezakegu, baina prozesuaren amaieran adi egoteari uzten badiogu, arrisku handiak sor daitezke.

Pilatzea enborrak modu egonkor eta ordenatuan antolatzea eta metatzea da. Ordena-kontua ez ezik, segurtasun-kontua ere bada. Hasi baino lehen, kuadrillak nola lan egingo duen planifikatu behar du, lurra aztertu eta makineriak eta segurtasun-sistemak behar bezala funtzionatzen dutela egiaztatu. Pilatzeko eremuak eta ibilbideak planifikatu behar dira oker dagoen lurrean egurra kargatu behar ez izateko.

Maniobretan, oinarrizkoa da makinaren ekintza-eremuaren barruan inor ez egotea. Makinistak ziurtatu behar du kargak mugitu aurretik eremua garbi dagoela.

Ohiko akats bat da piletara igotzea enborrak ondo jartzeko, baina praktika arriskutsu hori beti saihestu behar da, enborrak mugitu baitaitezke eta erorketa edo kolpe larriak eragin. Zoruak sendoa izan behar du, eta, ahal den guztietan, laua. Behar izanez gero, ziriak erabili behar dira, egurra ustekabean ez mugitzeko.

Ahal dela eskuz ez da pilatu behar, baina eskuz egin behar bada, lana erraztuko duten tresna osagarriak erabili behar dira eta enborrak biraka mugitzen saiatu, jaso ordez. Beraz, eskuz egiten badugu pilaketa, gehienez metroko altuera emango zaio, langilearen gainean kolapsorik ez izateko. Eta pilaketa bat ezegonkor badago edo okertzen hasten bada, berehala berregituratu behar da.

Kargatzeak, bestalde, garraioaren faktorea du. Hemen, kamioiak, garabiak eta pisu handiak erabiltzen dituzten ibilgailuak sartzen dira. Zereginean hasi aurretik, ibilgailua zein egoeratan dagoen egiaztatu behar da, eremu seguru batean aparkatu eta balaztak eta euskarriak aktibatu.

Baso-lanen gainerako faseetan bezala, tartean dauden pertsonen artean komunikazioa argia izatea ezinbestekoa da inor ez harrapatzeko edo inork kolperik ez jasateko maniobrak egiten diren bitartean. Kabinatik lanerako eremua ondo ikusi behar da, eta, ikuspen gutxiko eremuak egonez gero, gaitutako eta kualifikatutako behatzaile bat izendatu behar da.

Gehiegizko kargak saihestu behar dira, kontuan izanik zeintzuk diren irismen desberdinetarako gehienez baimendutako kargak. Kargatzen hasteko, hurbilen dauden enborrak hartu behar dira, egonkortasuna lortzearren. Zamalanetan, kargaren mugimendu pendularrak saihestu behar dira. Fabrikatzaileak adierazitako lan-angeluak errespetatu behar dira.

Inoiz ez da lan egin behar zintzilik dauden margen azpian, eta makinistak ez du kabinatik alde egin behar karga airean utzita. Zuhaitzak ez dira kabinaren norabidean kargatu behar, eta haizea dabilen egunetan kontu handiz ibili behar da. Enborrak luzetara jarri behar dira, puntalen altuera gainditu ez dezaten.

Maniobrak poliki, kontrolatuta eta abiadura lurraren egoerara egokituta egin behar dira. Ustiategiaren barruan, maniobrak egiteko eta zirkulazioa behar bezala antolatzeko behar den espazioa ezagutzen badugu, alferrikako talkak eta arrisku-egoerak saihestuko ditugu. Garabia garraiorako posizioan jarrita eraman behar da makineria eta inoiz ez karga grapan jarrita.

Lotzerakoan, karga ondo ziurtatu behar da gorabeherarik ez izateko (joan-etorriak, erorketak…) eta lokailu-kopurua enborren luzerara egokitu. Zingilen edo kateen egoera egiaztatu behar da, elementu osagarri guztiak bateragarriak direla egiaztatzearekin batera. Plataformara ez igo lotze-lanak egiteko eta, ahal dela, autotentsatze mekanismoak dituzten tenkatzaileak erabili.

Kontuan izan beharreko beste alderdi bat da inguruan aireko linea elektrikoak dauden ikustea. Distantziak ondo kalkulatzea, zuloak edo desnibelak kontuan hartzea eta garabiaren besoaren mugimenduetan kontu handiz ibiltzea funtsezkoa da istripu elektrikorik ez izateko.

Azkenik, lanak amaitu arte NBEak erabiltzea ezinbestekoa da: kaskoa, segurtasun-botak, eskularruak, entzumen-babesa eta arropa islatzailea. Pilatzea eta kargatzea ez dira erremateko lanak, prozesuaren gainerakoetan bezalako arreta eskatzen duten zereginak baizik. Prebentzioa izan behar da azken enborra ziurtatuta egon eta lana segurtasunez amaitu arte.